كل سنة وانتم طيبين .. واحنا لأ
كل سنة وانت طيب … هتسمعها من دلوقتي لغاية بعد العيد الصغير ، يخلص العيد الصغير تلاقي العيد الكبير وراه على طول ، صدفة غريبة ! أنا بقول كده برضه ! كل سنة وانت طيب بقينا نسمعها طول السنة في اشارات المرور وعلى ابواب الجوامع ودورات المياه العمومية وانت بتقطع تذكرة سينما ..في محطات الأتوبيس وأي مكان انتظار بمناسبة ومن غير مناسبة هتلاقي ناس كتير تعدي عليك وتقول لك .. كل سنة وانت طيب ياباشا …
لكن ليه الناس اللي محتاجين يسمعوا الكلمة دي فعلا محدش بيقولها لهم ؟ مش لازم تتقال بوقيقي يعني عشان يبقى اسمها اتقالت وخلاص ، في الحقيقة في ناس بيتملكها الحزن والأسى من التهنئة دي بالذات ومن فرحة الناس بالأعياد والمواسم عموماً لأنهم مبيلاقوش حد يقولهم كل سنة وانتم طيبين من قلوبهم و بجد ، مبيسمعوش من حد كلمة تهنئة مصحوبة بحب وود مش بشفقة وعطف لمجرد القيام بواجب وخلاص ، عارف مين بيقول كل سنة وانتم طيبين واحنا لأ؟
كل دول بيقولوها
كل أب وأم ولادهم وبناتهم اتلهوا في حياتهم وقسوا عليهم وبيقولوها لهم لما يفتكروا بتليفون ووعد بالزيارة ، كل أب وأم مسنين ولادهم كرموهم ورموهم في شقة بدل دار المسنين عشان سمعة العيلة واكراماً ليهم ! وبياخدوا لهم أكلة في رمضان ويروحوا ياكلوها معاهم ! … كل سنة وانتم طيبين واحنا لأ
كل طفل في ملجأ بيجيبله زوار من السنة للسنة لأنه في دار أيتام مش مشهورة ولأن الحياة بتاخد الواحد ، بيطبطبوا عليهم وشوية هدايا وشفقة وعطف .. ونشوفكم بعدين .. ويمشوا وميرجعوش إلا بعدها بسنة في نفس الوقت ! .. كل سنة وانتم طيبين واحنا لأ
كل طلاب ابتدائي اللي بيروحوا المدرسة ويشوفوا سندوتشات اصحابهم ويبقوا مكسوفين يطلعوا سندوتشاتهم اللي بعيش الفرن أبو شلن عشان محدش يتريق عليهم .. بيفرحوا برمضان عشان هيعملوا صايمين وميطلعوش سندوتشاتهم ، اصحابهم يتكلموا عن الياميش وهمه ميعرفوش إلا التمر ! .. كل سنة وانتم طيبين واحنا لأ
كل سواق أتوبيس عام بتيجي عليه ساعة الفطار وميقدرش يروح ياكل مع ولاده وشايف العربيات ادامه بتجري عشان تلحق الأدان والأكل ، والركاب واقفين وبيستعجلوه عشان يوصلوا ياكلوا مع ولادهم وهو لأ … كل سنة وانتم طيبين واحنا لأ
كل فلسطيني بيتفرج على قناة مصرية أو خليجية وبيشوف الجنون الاستهلاكي ومظاهر الاحتفال وهو يادوب مستني يقبض راتب متاخر عشان يقدر يدفع مديونياته ويكفي بيته باقل الزاد .. كل سنة وانتم طيبين واحنا لأ
كل معتقلي النظام اللي مبيبقوش على ترابيزة الأكل مع أهلهم في أول يوم رمضان… كل سنة وانتم طيبين واحنا لأ
كل ضحايا عبارة السلام اللي لسه عايشين ومحدش عارف مكانهم .. كل سنة وانتم طيبين واحنا لأ
كل بواب بيشيل أكياس مؤن رمضان عن السكان ويبقى مستنى بواقي الأكل.. كل سنة وانتم طيبين واحنا لأ
كل المرضى في الدمرداش ومعهد الأورام ومستشفيات التأمين الصحي … كل سنة وانتم طيبين واحنا لأ
كل ست كبيرة مريضة مصممة تصوم اليوم اللي هتنزل فيه تقف في الطابور عشان تقبض المعاش ..سبعين جنيه ! كل سنة وانتم طيبين واحنا لأ
كل الأسرى في سجون الاحتلال الاسرائيلي..كل معتقلي جوانتنامو ..كل حد فرق الظلم بينه وبين أهله واتحرم من لمة العيلة … كل سنة وانتم طيبين واحنا لأ
كل فقير لا يسأل الناس إلحافاً ، قافل عليه بابه بهمومه وأوجاعه وراضي بالفول البيتي وزبدية على الفطار وفي السحور.. في رمضان .. وطول السنة ! كل سنة وانتم طيبين واحنا لأ
كل أطفال الشوارع اللي بيستنوا مائدة الرحمن عشان هياكلوا فيها اكل بني ادمين .. كل سنة وانتم طيبين واحنا لأ
كل سنة وانتم طيبين… واحنا لأ
رسالة أثرت فى جدا ياعبد الرحمن
Posted 10 months, 1 week agoوكل سنة ونحن جميعا وهم طيبون وبخير
اااايييه يا عم
Posted 10 months, 1 week agoبوست اثر فيا اوى بجد
كل سنه وانتم طيبين واحنا لأ
بحييكم على كلامك واسلوبك بجد
يلا
كل سنه وانت طيب والامه الاسلاميه بخير ونحن جميعا طيبون
معاك حق يا عبدالرحمــن
Posted 10 months, 1 week agoبوست شديد
قوي
كلامك مؤلم فعلا
ربنا يصبر الناس على بعضها يا جادو
و ينعاد علينا بالخير يا رب
منى
اولا ………حمد على السلامه بعد الغيبه الطويله دى
Posted 10 months, 1 week agoثانيا …. صدقنى اخى الكريم ان العذاب اللى الواحد بيحس بيه لما بيبص للناس اللى حواليه ومش قادرين يحسوا بكلمه كل سنه وانت طيب بيقتل جوانا احنا الاحساس ده … فعلا الفرحه اغتيلت على ايدى الفساد وتدنى الاخلاق….
كلام جميل استاذ عبد الرحمن…وعلى العموم كل سنه وانت طيب
روح يا اخي منك لله ….هو انا ناقص ؟…معلش يا عم جادو بس الموضوع ده فعلا بياثر فيه من زمان …
Posted 10 months, 1 week agoيااااااااااااااااااه ايه الكلام دا؟؟؟؟؟؟
اسلوبك رائع
بس كلامك وجعنا
____________________________
اللهم بلغنا رمضان
اللهم اعده علينا بالخير واليمن والبركات
ولا تجعل بيننا حزينا ولا مهموما ولا شقيا ولا محروما
____________________________
Posted 10 months, 1 week agoكل سنة وانت طيب
Posted 10 months agoGood to read from you after this long absence! i missed reading your posts.
really great post, and very true to the point where it hurts us in the heart and soul…nothing more i can add to it other than Rabenna Yekremak during the great month of Ramadan and everyday of your life!
رائع كعادتك
Posted 9 months, 4 weeks agoوعود حميد
وكل عام وانت بخير
ههه
كلامك صحيح ميه فى الميه مقدرش اقول حاجة بعد الكلام اللى قولته
Posted 9 months, 3 weeks agoبس برضو لسه الدنيا بخير اكيد زى ما فيه ناس بتاكل بعضها ولا بيهمها حد فيه ناس تانية بتخاف على بعضها اكيد
زى ما فيه كدة فيه كدة برضو وربنا عمره مش بينسى عباده
ورمضــــــــن كريـــــــــــم
كل سنة وانت طيب يا شقى
Posted 9 months, 2 weeks agoوربنا يجعل ايامنا كلها سعادة وهنا ونقول دايما كل سنة وانتم بالف صحةوسلامة
رمضان كريم
معاك الف حق يا عبدالرحمن ..
كتير بنكون انانيين ..
كتير بننسى غيرنا .. كتير بنتوه ونغرق وسط همومنا وحتى وسط افراحنا ..
كلامك موجع جدا .. ومؤثر جدا جدا ..
تعرف في اية في القرءان بتقول ” لن تنالو البر حتى تنفقوا مما تحبون ..” صدق الله العظيم .. الاية دي على فكرة مدلولها عظيم لايل يحسها فعلا ..
عاوز تكون فعلا انسان صادق مع نفسك في عطاءك ونيتك خالصه للرحمن سبحانه .. راعي دول او جزء من دول .. ابدء بجارك ابدء بالقريب منك .. ابدء بانسان محتاج فعلاً وما بيسالش غير المولى سبحانه .. ساعتها بس ممكن نحس ونقول كل سنة واحنا كلنا طيبين .. واحنا حاسين ببعض .. ومقدرين ظروف بعض .. مش كل سنة واحنا بعاد . انانيين . قافلين على نفسنا . نعيد لوحدنا . ونفرح برضه لوحدنا ..
تسلم يا عبدالرحمن على كل حرف كتبته هنا .. وعلى التذكرة القوية بمعنى ومدلول اتسرسب شويه شويه ولم يعد له وجود حقيقي ..
واخيرا اعتذر عن الاطالة .. وربنا يبارك فيك .. وطبعا كل سنة والجميع بالف الف خير دايما
Posted 9 months agoأنا أول مره ادخل عندك يا عبدو وبصراحة أثر البوست فيا جامد دا دليل على أن جواك أحساس جامد جدا وراقي يهنيك عليك وكل سنه وانتم طيبين وأحنا وكل سنه وهما متجمعين واحنا معاهم علشان يبقى كل سنه هما طيبين واحنا معاهم وجنبهم كلهم
Posted 9 months agoجامدة اوى
اصلا مش اى حد يا جادو ياخد باله من لحاجات دى
شىء جميل كمان انك تحس بغيرك كده
شعور جميل واحساس عالى
احمد عيد
Posted 9 months agoفاكرنى يا جادو