تفسير الأحلام … مجتمع تايه
الوو.. ايوة.. انا حلمت امبارح بالرئيس حسني مبارك جاي لابس ابيض فى احمر فى اسود ممكن حضرتك تفسرلى الحلم ده؟ الووه.. ممكن اكلم الشيخ سيد.. اتفضل..انا حلمت ان الواد ابنى راكب عجلة وانا بجرى وراه ممكن الشيخ سيد يفسر لى الحلم ده !؟ طبعا لن استطيع سرد نماذج كثيرة تأتي عبر برنامج تفسير الاحلام التى تذيعه قناة المحور ويقوم بتفسير الأحلام الشيخ سيد حمدي .. بصراحة انا اول ما شفت الراجل ده مرتحتلوش نفسيا وحسيت انه هجاص و كلامه ميدخلش ذمتى بتلاته تعريفة ويبقوا كتير عليه كمان .. بما اننا شعب فى الضياع و ما يقرب من نص الشعب بيعانى من الأمية العلمية و نسبة تزيد على النصف تعاني من الأمية الدينية والثقافية وغياب الوعي والتعلق بقشاية الموالد والمقامات وكنس السيدة ثم الى برامج تفسير الاحلام اللي هي طبعا التطور الطبيعى للتوهان اللي الشعب فيه والمصيبة الكبيرة لما تلاقي متعلمين وخريجي كليات ويمكن كمان بعضهم معاهم ماجستير أو دكتوراه وما زالوا مصرين على التخلف والتعلق بالاحلام والاوهام ، لا شك عندى ان بعضهم يعلق اماله على تحقيق أي حلم يعتبره إشارة لتحقيق حلمه بعربية أو بيتش باجي! بالطبع كل ده نتاج حالات التخلف والجهل اللى بيستفيد منه النظام خاصة بعد ما رأيناه من تأييد للطرق الصوفية- اللى المفروض ملهاش فى السياسة - للرئيس مبارك ، قيل وقتها ان عددهم تلاتة مليون - مش عارف الأرقام دى منين - المهم أن هذه الأمور التى تستنفر طاقة الشعب وتسيطر على اهتمام فئات لا يستهان بعددها و لا يستهان بتأثيرها ان علمت مدى التوهان والهطل اللى همه عايشين فيه أصبحت ذات جدوى حياتية يصعب على متابعيها الاستغناء عنها فترد للقناة إس إم إس بالعبيط لمجرد أن منقذ أحلامهم المبهمة غاب عن إطلالته البهية
شخصياً … مبقدرش ومبستحملش أشوف سيد حمدي ده.. لكن حاولت مرة اسمعه عشان يمكن انا غلطان وظالم ومفتري والراجل طيب ومسالم , وكانت المرة الأولى والأخيرة بعد أن جعلني العن ظلمات التخلف التي أودت بنا إلى هوس جديد مبالغ في أهميته وأثره , طب بالله عليكم … واحدة حلمت بالرئيس حسني مبارك يبقى ايه؟ عند الشيخ سيد يبقى هينالها قسط من الحُسن والبركة لأن رؤية أشخاص عظماء في المنام - زى الرئيس طبعا- دليل ان الخير قادم! بتتكلم جد يا عم الشيخ؟ يا حاج قول كلام غير ده ! طيب لنتقبل فعلاً أن رؤية ذوي السلطة بغض النظر عن حسن أو سوء إستخدامهم لها هو أمر جيد ، لكن تجاوز الأمر الذي يدفع بالرجل إلى انه يوالس .. بلاش يوالس .. خليها يجامل … فده اللي مش جيد خالص … والله الراجل ده هو أحد أهم النماذج الواضحة لمدى البتنجان الذي أصاب عقول المسلمين… واحدة تانية حلمت بعمرو دياب … وواحدة حلمت بعمرو خالد غير بقى اللى حلموا بنانسي وهيفا- أحلام بريئة يعنى - ، وغير اللى حلم بقطر داس على رقبته وقصف عمره وعايز يعرف هو الحلم ده هيحصل ولا لأ.. يمكن الراجل تجيله فوبيا القطر وميركبوش ولا يعدى على شريطه طول حياته!! من الممكن أن تقضي وقتا سعيداً فى متابعة هذا البرنامج الخنقة وتضحك على تفسيرات الشيخ سيد التى لن تختلف عن تفسيرات بياعة فجل فى سوق العبور بترغي مع جارتها فى الفرشة اللى جنبها , ستضحك كثيرا عندما تشاهد هذا الرجل وترصد رد فعله وديباجاته اللى تجيب الشلل بأقل وأهذب تقدير ،سرعان ما سيتصاعد ضحكك لو ربنا كرمه بسؤال من واحد أو واحدة حلمت بشخص مشهور… فلو حضرتك مثلاً حلمت بصفوت الشريف فأكيد انت من صفوة الناس وأكيد نسبك شريف!!! أي والله الشيخ سيد هيقولك كده .. ولو حلمت بكمال الشاذلى يبقى حلمت بشخص فيه من كمال الصفات الحميدة والشاذلى دي بقى شوفلها أى تفسير انت بقى وفسر ياباشا وعيش حياتك
تخمة برامج الفتاوى على الفضائيات وبعض البرامج التى تستضيف بعض الدعاة دليل على ان المجتمع تايه فى مشاكلة التى تبدا من خلافات الزوجين وخيانتهم لفراش الزوجية مرورا بقضايا الحجر على الاباء مرورا بحالات الطلاق التى لا يعرف أصحابها همه طلقوا بجد ولا كده وكده !
طبعاً غياب الدور القوى الذي كان يتوجب على المؤسسة الدينية القيام به من الدعوة الصحيحة واطلاق يد الدعاة والوعاظ ودعم الأكفاء منهم وتنمية مهارات تواصلهم مع الناس وعدم تكميم افواههم وتقليص دورهم الاصلاحى فى المجتمع هو واحد من التحديات التى تواجه كل مصلح يبحث عن الشعب ليساند قضايانا ويدعمها ويواجه الظلم والبطش والفقر والمرض فلا يجده.. طب الشعب راح فين!!؟ الشعب تايه فى دايرة مغلقة دفعته اليها الأنظمة القمعية التى شغلته بنفسه - احتياجاته الاقتصادية -تحدياته الاجتماعية– عن ما هو أهم وأنفع لحياته التي غاب عنها الاستقرار الحقيقي
أخيراً اقول : اذا كان البطش والطغيان هى سواعد النظام فى القضاء على الشعب فإن الجهل والتخلف والأمية العلمية والثقافية هى سواعد الشعب التى تدعم نظاما متهالكا بيتعكز على شعب بعضه عايش على وهم الرؤى والأحلام في المنام.. وبعضه عايش على أحلام اليقظة
لالالا معلش انت كده بتخبط فى العلماء
Posted 11 months, 3 weeks agoالشيخ سيد ده حبيب قلبى ولما بكون بقلب فى القنوات والاقيه لازم اتفرج عليه ده بيفسر الاحلام بالايات والاحاديث واللى انت متعرفوش انه مكشوف عنه الحجاب
ولما واحده تشوف جزمه فى المنام يبقى جالها عريس
طب ده حتى ماحددش اذا كانت جزمه رجالى ولا حريمى ولا مقاسها كام
وبعدين مش اى حد يفسر الاحلام ده وهو صغير شاف فى المنام سيدنا يوسف بيسقيه كوب لبن يعنى مش اى حد خد بالك
ده جهبذ ربنا يخليه لينا قولوا آمين
بس انت ماسمعتش عن الشيخ سالم ولا ايه انصحك تبقى تتفرج عليه هتستفيد كتير اوى
وسلام
جت ع الشيخ سيد
Posted 11 months, 3 weeks agoمحمد
سمعت عن الشيخ سالم كل خير بصراحة بس محاولتش اشوفه ، اطمنك اني خدت ذنبه مقدما
احمد يا عيد
إلى أن أتصل بك غداً .. تصحبك لعنات الورد بريس والميسدات الليلية ..لسه محمد قايل لي من شوية بس والله لاني مشوفتوش من اسبوع وكنت منقطع اضطراراً
Posted 11 months, 3 weeks agoربنا يفتح عليك يا عبدالرحمن .. برنامج الشيخ سيد وامثاله من الدعاه .. امثلة ودلائل حية على مدى الجهل “المعشش” في العقول ..
شوف كمان برامج السحر والشعوذة ايل بتابلك مكان ما تروح بين القنوات .. حقيقي ما بقدرش احتمل تربحهم بالقرءان وسوره .. وضحكهم على عقول الناس بشكل غببببببببببي
الواحد يقول ايه بس ربنا يرحمنا .. اه على فكرة كنت مرة قريت زمان ان تفسير الاحلام بجد بيكون ابعد ما يكون عن ايل بيقدمه الشيخ سيد وقناة المحور .. لان المفسر بيكون له خصائص معينة من خلوص النية وعلامات الايمان .. ده غير انه يكون على معرفة بالشخص صاحب الحلم ذاته .. حياته سلوكه التزامه والخ
تحياتي ..
Posted 11 months, 3 weeks agoمعلش يا عبد… أنا النهاردة مش جاي اعلق كالعادة
النهاردة جاي ادعوكم كلكم للمشاركة في الحملة القومية لإنقاذ خطوط الإنترنت من النهب و السلب اللي هتتعرضله على إيدين الحرامي الكبير وزير الاتصالات
انقذ نتك يا مصري… انترنت بلا حدود
لمزيد من المعلومات راجعوا المدونة بتاعتي
يا جماعة لو ما وقفناش لهم في دي مش هنعرف نقفلهم تاني
أبوس ايديكم بلاش مصمصة الشفايف المرة دي… دي مسألة آدمية.. مسألة كرامة… كفاية بقى
سلام
Posted 11 months, 2 weeks agoيا جماعة الحمد لله القرآن لسة موجود ولم يحرف
Posted 11 months, 2 weeks agoربنا يرحمنا من قنوات الفتاوى دى
الذي يعتبر نفسه فاهما لكل شيء و متقدم في تفكيره و ان الاخرين جميعهم متخلفون يجب أن يراجع حساباته مع نفسه قبل ان تجره طريقته هاته لمتاهات او ربما للهاوية لا قدر الله
Posted 10 months, 3 weeks agoإذا كنت لاتؤمن بوجود الرؤيا فانت تضرب الإسلام أيضا ويجب ان ترى في طواف المسلمين بالكعبة و تقبيل الحجر الأسود تخلفا لامثيل له …والمهم أن يكون الشخص صريحا مع ذاته قبل ان الآخرين ، أنا لا ادافع عن مفسري الأحلام جميعا ولكن للشهادة فإن سيد حمدي قد أقنعني بانه لا يهذي ولا يشعوذ كما قد يبدو للبعض وكنت منهم إلى وقت قريب ولكنني غيرت رأيي بعد أن سمعت منه تفسيرا لأحد الرؤى تتطابق مع ما أراه في أحلامي هذا التفسير لم أسمعه من احد قبله وكان مطابقا تماما للواقع الذي عشته لذلك أقول يجب أن نزيل الأحكام المسبقة من قواميسنا ونكون موضوعيين مع الآخرين ولا نحكم بالتخلف والشعوذة على كل أمر يفوق تصورنا وفهمنا او لا يتماشى مع ثوابتنا.
والله يا جادو مش عارفة أقول إيه
Posted 10 months, 3 weeks agoكل حاجة بقى ملهاش طعم كده
البرامج الحوارية…..خناق في خناق
والدينية…كلوا بيفتي…وأي كلام في رغيف حلاوة
والشيخ سيد….بركـــاته
!!!!!!!!!!
بهنيك على بوستاتك الجميلة جدا و أفكارك المنيرة دائما
و يسعدنس جدا إنك تشرفني
http://wa7dania.blogspot.com
تحياتي
منى المحمودي
احلام بث على انترنت بكتبة
Posted 10 months, 2 weeks agoالسلام عليكم اناحلمت انا
Posted 10 months, 1 week agoطلعةعلي سلالم واناطلعة لقيت قدامي سطح ولقيت بوتجاز كبير وحلية رجالة عايزين يولعوة ومش عارفين حبيت اعمل عمل طيب قمت مولعهلهم ونزلت وشوية لقيت النار مسكت وهاجت في المكان كله هربت من ده وطلعت اجرى واخت ولادى الاتنين معايا وهربتهم من خوفي عليهم من النار وبعدكده رجعت تاني وطلعت فوق السلم ووقفت اشوف النار وهيا بتلع من الدور الاول فيع في الاول بالسطح وفجاءة لقيتهم بقولو ان ياسمينسلفتيولعت كلها وبقت عبارة عن فحم اسود
السلام عليكم حلمت ان ياسمن سلفتي بقولو عليها ان النار ولعت فيها كلها وبقت عبارة عن فحم اسود والنار بتكرر معايا كتير في المنام
Posted 10 months, 1 week agoارجو من فضيلة الشيخ سيد انه يتكرم لتفسير هذاالحلم لاني الان في غاية القلق وشكرا علي ماقدمته لنا وعلي بذل المجهد الخطير التي تقوم به وربنا يرعاك ويرعا المسلمين والامة العربية كلها
Posted 10 months, 1 week ago